يالله ياعالم خفيات الاسرار
ياعالم مايطرق المودماني
تفك حبس اللي من العام بوسار
وتمحا موده صاحب قدبراني
غر وتسبب لي بحبس وتحيار
على صاغ ماتعدا مكاني
لاما وسرني وسره الجلد للطار
مافيه عقل ويقرعه مطرباني
خمر حديثه للجسد نافع ضار
بغيت نفعه لين شره سداني
للعقل سحار وللشوف قمار
ماينعرف رطنه من المعرباني
القرن ذيل اللي ايشعشع الى غار
أشقر عليه قروح ماهوب واني
حصان الشيوخ الي من البر مشكار
ماينقهر لولا الرسن والعناني
والعين عين الي يرفرف الىطار
إن شاف حوم ورد روس الياني
والخد قرطاس العجم مابه أسطار
في يد خطيب ونايشه زعفراني
والخشم سله هندي صنع بيطار
يحفيه رده بخنقه مايداني
والعنق عنق أدميه ترعى الاقفار
أوحت حساس ورزته بجفلاني
هافي حشا كنه من الزاد محتار
وانهود مثل مكفيات الصياني
عدل يشيل الثوب ردفه الى ثار
ماهوب من الى عرضهن بالمثاني
كن القدم بالساق عصب لخطار
قبل النجاح وقبل فرس اليماني
هذي وصوفه واعذروني يالاخيار
من لاعذرني ماذاق برد الجناني
انكان منتب عاذر عقب ماصار
بالله ويش الي عليه تهداني
قلت الشريعه قال نار بن عمار
يبيني الحسها تحرق لساني