رقيت بْمرقبٍ تشفي هبوبه
أبى الراحه وقلبي ما استراحي
أرِدّ بْه النظر منّه وصوبه
واضيق وهالفضا حولي براحي
شربت القاف لو هم حَثْربوا به
أدير أصفاه من راحي لراحي
إذا غيري غدا قافه ركوبه
يورّدها على الجال الملاحي
أنا قافي من المزنه سكوبه
قراح وكل ما جابه قراحي
واذا ما الراس بالحيل مْعَصوبه
تعلّتها القنا من كل ناحي
أنا اللي كل ربعه هَذْربوا به
يجيه الهَرْج من واحي لواحي
إذا يا رب هذي لي عقوبه
أنا تايب وراجيك الفلاحي
ترى قلبي كما بيتٍ عدوا به
جيوش وْتَوّ نور الصبح لاحي
واهيله يوم عدوانه غشوا به
تغشّاهم من الموت الوشاحي
فلا عمده تجوّدها طنوبه
إذا لجَّت جوانبْه الرياحي
وانا قلبي كما الورْق اللعوبه
لها بالجو ممسا واصطباحي
على الغصن الشمالي مَعْ جنوبه
تفيّا كل ظلٍ بالبياحي
لها نوحٍ تعَذْرِبْه العذوبه
إذا ما سِمْعه المحزون ناحي
دهاها الحر واليوم بْغروبه
وّغَرَّ بْهَا الجناح أم الجناحي
سمت بالجو ما منْه مْهَروبه
وتلقّتْها وسيعات البطاحي
يا أمّ الطوق والآه مْغَصوبه
أبيحي يوم تثْخِنْك الجراحي
سبيل الموت للنفس العجوبه
أخير مْن المهانه والصياحي
إذا ما قلت يا فَزَّاع نوبه
ولا من جَرّدوا دونك سلاحي
لك القبر إن تهايل بك جنوبه
ولا وَقْفَتْك في باب الشحاحي