في هالزمن ماعاد ادور صداقه
دام ان صديقي ماسلم من صديقي
ياما انخدعنا في بحور اللباقه
لكن يبان مْن الزراق العميقي
ومانبخص العالم سوا بالعلاقه
مايكفي الرجال نسلن عريقي
مثل الكلام إليا انفهم من سياقه
يا يطيقه اللي يسمع او مايطيقي
اقولها وادري بقابل حماقه
ويفيق من لافكر انه يفيقي
هذا يسكّر باب ويفك طاقه
وهذاك ما بين البَرَد والحريقي
والا الوفي يبقا زعيم الطلاقه
ومن ما اقوله مايفكر يضيقي
عقله بحر والموعظه باصطفاقه
وصدره محيط ولادرى بالمضيقي
ومن طاقم اقرابي وجمع الرفاقه
ابقى على كيفي اشكّل فريقي
ما ابغا بدوري عز تُرفع بطاقه
ولعلّ ما يبتلّ بالزيف ريقي
وكلن على كسب الرجوله نطاقه
للارض علم وللسحابه بريقي
والطيب لو ماعان ساقي بساقه
ياجعل ساقي ماتكمّل طريقي
يامزورين الضحك بين الصداقه
ماني مضيع بينكم من صديقي