كذا من دون زخرفة الحديث وبهرج التوظيف
كذا من دون تعقيد وخرابيط وكلام أفلام
يقولون السماء تمطر ولكن يا مزون الصيف
شبعنا من خرافات الوصول وكذبة الأوهام
مبادينا سرابٍ بأخره طعم الأسف والحيف
وأمانينا محالٍ في طريقٍ يقتل الأحلام
صدقنا لكن الصدق يتوارى مثل وجه الطيف
ولا ينفع سوى الكذب المقيت بعالم الأرقام
خويي والمنابر عوّدت عقب الثراء تشريف
علاها الفارغين وعظّم الوقت الردي أجرام
تدق صدورها مدري طبول الوهم والتسويف
وترجع كل ما حمي الوطيس تنكّس الأعلام
لك الله يوم أبرّق ما لقيت اللي ك حد السيف
ولكن يا كثر يوم أتلفّت شرهة الأقزام
أدق النجر في ظلما السنين ومابقى للكيف
سوى النزر القليل وتغرق الدنيا بالإستفهام
هنا تتأرخ الدنيا ورق يروى بلا تحريف
هنا يتدوّن الصدق الكريم وتسقط الأزلام
هنا والشعر مثل البرق مثل الحلم مثل الظيف
هنا والفكر سوق المترفين ومبعث الألام
هنا والصبر يترنح فوجه المهزله والزيف
هنا والشاعر أعذر من ملام وجفّت الأقلام