لابارت الهقوات واخطن الاقدام
والريح هبت عكس درب السفينه
لانبكي الفايت ولا نرثي احلام
والغيض لو هو كبر اجا كاظمينه
قدام يابيض المقادير قدام
ياما تزين لكل نفس حزينه
اما بعد ياذا الجلاله والاكرام
يامن لك الداعي بسط راحتينه
الهمني السلوان عن ماضي الايام
عن ماجرى بين الضنين وضنينه
العام اقول الله يعديك ياعام
واليوم اقول العام ماشفت زينه
شمس الحقايق بددت غيم الاوهام
والانتظار انجب ليال الغبينه
يابنت كان الشك في خاطرك حام
ماكل علم مصدره من جهينه
واليا رفعتي للوهم بيض الاعلام
حطي على قبر الرجا ياسمينه
تستغربين انه يحبك وهو شام؟
مفروض لو ماشام تستغربينه
حنا حشام وعندنا شيمة حشام
لو هي تحب نفوسنا مانهينه
وانا ليا عدو نزيهين الاقلام
لقيت لي مع اول الطرش عينه
شوفيه يبقى شامخ مثل الاهرام
يصد لو قلبه تجاهك وعينه
ياهاجري وان بعتنا باردى الاقيام
عنكم نروح وودكم حافظينه
كان انت ناسينا تصحيك الايام
ترجع لنفسك لين تلقى يقينه
توسطو في وضعنا بعض الاقزام
وانا ردي الجاه ديني ودينه
لو العرب سوو عنه بعض الافلام
ماعنده الا برد كفه وعينه