يا طير ياللّي تبرقع ما خذو شوره
أيام عزّك توارت كلّها ليلي
لا لا تكدّر ترى الدّنيا كذا دورة
من عمْرها بدّلت الحال تبديلي
اللي طرح حظوتكْ اصبر على جوره
يوم الهدد جايِلك بْدون تعجيلي
وان جاك يومك، معاد انت بْمن طيوره
عوّل على فطنك و تلقى تساهيلي
واكفخ جناحيك عفّها عن وكوره
لا توقف إلّا على وكرٍ ورا سهيلي
وش تسوى دنياك اذا ما النفس مقهورة
والجاه ما له بهالعيشة مداهيلي
الذّل مثل الرّديْ مايجوز عن بوره
ولا يطيّب رديْ طول التماهيلي
نفسك على الذّل ترى ما هي بمجبورة
مخلابك يعزّها عن التذاليلي
و خلّها بْذكر ربّ الكون معمورة
لا صبّحت يومها حمْدُ وتهاليلي
بأمره يعزّك جزا ويمدّ لك نورة
ويسوق لك بالعطا رزقٍ هماليلي