رغم انف طغيان الجناة الطحاطيح
والله كبيرة يامعاقل صروحي
صدي الظروف العاتية واهزمي الريح
عيشي معايا في طلاسم وضوحي
الوقت ارعن والليالي مشافيح
صمت المكان يفوق صمته طموحي
صندوق قلبي ماتفكه مفاتيح
دونه ضلوع صافنات جموحي
لابارك الله بالوجيه المكاليح
سود القلوب اللي تبنو جروحي
قفو بأعذب فاتنة ريمة السيح
الجادل اللي ماتمنت نزوحي
قفّت وانا اشوف الدموع المسافيح
ماودي اسمع سالفتها ولا اوحي
مابين اصيح وبين ابصبر ولا اصيح
مثل الذي مابين صمتي وبوحي
حضّي عجوز تمشي شوي وتطيح
هي عنكبوت وسلكها خيط روحي
الحر مايحرث حقول الفلاليح
ماهو على هزل النوايا كدوحي
ياصمتي العاجز يكفيك تلميح
لو تظهر العفه سكوتك ذبوحي
هدوء قبل العاصفة دون توضيح
دمعة قهر تسبق تقاطيع نوحي
اعاني الديجور وين المصابيح
عجزت احصلّلي صديقٍ نصوحي
ماعدت اطيقك ياحنان التماسيح
السم بأنيابك ودمعك سفوحي
وين انت ياللي تسكن القلب وتريح
يسعد خفوقي شوف وجه سموحي
الناس تفرح مادرو بالمجاريح
وانا خفوقي بين حدبه يفوحي
اعصر صديد المهزلة واخرج القيح
مايستفيد الا لسانٍ لحوحي