واعمل قهوة زياده معاك
والحق حاسب يلا هناك
واعمل حلبه حليب للمتر
هي الشقه يابيه كام متر
أصلي شايفها غاليه شويه
هات للباشا إزازة ميه
ابعد يا يابني عن العربيه
أما عيال ناقصين تربيه
أيوه يا ماما جي ف السكه
أنا ف القهوة مش ف الشركه
مالك قاعد يابني مبوز
ماهي كات شورتك إني أتجوز
قلبي بيدعي عليك يا بعيد
جبت يا سيدي خروف العيد
رص يا هيثم كرسي معسل
أصل جمال تقلان ومكسل
شوف الكرسي ياعم بيرقص
بطل قرص شويه يا مرقص
فين القرص دا انت ضلالي
أيوه موتور الميه أيطالي
بس تلاقي الميه ضعيفه
عندي شوية فاكهة نضيفه
عايز كيلو.. ولا أتنين
هو الزهر أتزحلق فين
أيوه يا هيثم فين الشيشه
ملعون أم أبوها العيشه
أنا مش لاحق ع الفواتير
واحد شاي معاك يا كبير
المعاشات نزلت يا عبيط
بعت خلاص كل القراريط
علشان أجوز بيها الواد
أيوه خلاص انا جي يا سعاد
سك ياصاحبي على المشاريب
بس يا واد اتلم وعيب
شوفت الحلوه أم عبايه
خد وأديني كمان حبايه
فين القهوة وفين الشاي
حالا بس الدور الجاي
طب شيش يك
بطل عك
دا انت بتيجي عشان تتسك
طب مش لاعب هاتلنا قرفه
أيوه يا سيد شوفلنا صرفه
قبل بتاع الحي ما ييجي
أبن الوسخه اللي اسمه مليجي
شخشخ جيبك فك الكيس
هيقطع أمر التنكيس
مالك بس يا واد جاك خابط
ألحق جي علينا الظابط
اللي معاه ممنوع يا جماعه
يمشي بسرعه ويخفى الساعه
يا مرار طافح واد يا غريب
أجرى حاسبهم ع المشاريب
يلا بسرعه يا واد يا بهيم
إلا ما فيهم حد سليم