أنا ماني بلا حمزه ولاعنتر ولاجساس
ولا إلبرت أنشتاين ولانيوتن ولاكلارس
ولاني بعد ابو الطيب ولاني بعد ابو نواس
ولاني بالفخر مبدع ولاني بالهجا خارس
وحيد بسكة احلامي وانا بين الرجا والياس
مشيت بأول اكتوبر إلين آخر شهر مارس
سريت بليلي الموحش معي برد الشتا عساس
تسرب للضلوع العوج شدة برده القارس
وقفت وتشكي اطرافي على نفسي قوي الباس
وهي تستصرخ احساسي ملامح وصفها دارس
اشب الهاجس بصدري واولع بالقلم قرطاس
اولع له من اضلوعي عسى يدفا بها ضارس
وانور ليلي المظلم ولوانه شديد ادماس
ولا به صوت يزهمني ولا اسمع صلصلة جارس
انا وواقع يحاكيني وعقلي به يقيس قياس
اميز به ولي جهده وله جهدي بعد كارس
تصورته يصور لي سواليفه حكي جلاس
يقول اسمع قبل تدمع عيونك ينكسر تارس
وقف ويداعب اطراف الجدايد هبة النسناس
هناك ابعيد بأطراف المدينه منغرس حارس
قبل لاتكسر اغصانه قبل يطغى عليه الفاس
وهو من شدة اهدوه مع اوراق الشتا ناعس
تعال اوقف معه لحظه ابي تآخذ معاه انفاس
قبل لايغري اطماعك كريم وتحطب اليابس
لو ان الناس مجتمعه على وينه جنا غراس؟
تبي تقطف ثمر جهده ولاتنشد عن الغارس
قضيه لو عرضناها عرضنا جملة الكراس
وجندنا على شان القضيه موهبة فارس