طيّبت فال الفوز يا طيّب الفال
يا (راشد المكتوم) ما فيك حيله
الفوز بك يا عالي الشان يختال
والفوز يرغب كل راعي طويله
مبروك ما دنّت لك مزون الأقوال
ومبروك ما غِظْت بْمزونك مخيله
يا زاكي الجَدّين من عَمٍّ وخَال
يا بدرنا اللي في الدجى نستخيله
يفداك عَزم اللي تمنّى ولا نال
يا شوق ربّات العيون الكحيلة
لك مجد قبل وْمجد حاضر ولازال
وأمجاد لك في المقبلات الجزيلة
يا (راشد) اتْعَبْت المدى والمدى طال
واللي تِبَعْك أتْعَبْت عَزمه وخيله
كم سقت خيلك بين رمله وْمِسْيَال
وشَيَّلتها بالحزم ما لا تشيله
يا شبل من تفخر بطاريه الأشبال
شبل الأسد لي ما يِحَفْل الهزيلة
هذاك لى تَضْرِبْ به الناس الأمثال
سهل التمثِّل به ويصعب مثيله
فارس يِهزّ بْهيبته ألف خَيّال
ظاري على حمل الحمول الثقيلة
يدهل بغاياته على كل مدهال
دون المعالي ما تردّه عضيلة
وانته على درب العلا قايد أبطال
والشبل من ذاك الأسد له حصيلة
أشْهَد شهادة حَق والحق ينقال
لإنّك على الطولات ما في كحيلة