وش مسهرك يا معذب الشوق والليل
ترجي الصباح وصبحك الليل جابه
وش مسهرك ياما تغني مواويل
ماهو طرب ماغير وجد وصبابه
ونّة خفوقك كنها هادر السيل
واحيان كنّه ونّةٍ من ربابه
ارحم خفوقك لاتزيد الغرابيل
وارحم حنايا القلب من ما سطابه
قبلك غدى بالحب ركّابة الخيل
منهم نمر عدوان وجده غدى به
ومجنون ليلى ذاق من حبه الويل
واصبح مع العربان فاقد صوابه
وترى الهوى لاصار مابه تعاليل
تسري بك الأيام مسرى الذيابه
تمضي سنينك بين وجد وبهاذيل
ماتفطن إلا شيب راسك سرى به
وان كان خِلك مقفي ولا به الميل
ولا به أمل ترجيه ولا هو قرابه
خلّه يروح وشف عمرك مع الجيل
تلقى بديله فيه حب وذرابه
وترى الهوى يامعذب الشوق والليل
فيه الأسى والحزن بالغ نصابه