ما شكى الحب رجالٍ على الشدة صبور
يبتسم لو جروحه خضر والحال انبرى
لو غلا اللي تحبه بالحنايا قصور
دامه أقفى عليك الله تدوّر ذرى
والسراب اللي تشوفه ما يبل النحور
البلا اللي يقوله يحسب انه ثرى
ما ذبحني غير ظبيٍ جاني يختال بغرور
استحل الحنايا ولاعرفت اللي جرى
آه. يا قلبي علامك خابرك ماانت غيور
عادتك ما تصيد إلا جفول مذيّرا
ليه هذا الظبي صادك وانت صيادٍ جسور
جرجرك يا قلب وانت ماانت ناقص جرجرا
لعنبوا جدّه ذبحني ما يجيد إلا النفور
لا حضرت ابتسم لي وإلا عني ما درى
لفّني حسنه وزينه غصت في غبة بحور
موجةٍ تدنيني منه وموجة ترجع بي ورا
ضحكته بلسم جروحي والمشاعر له تثور
مكسبي منه الخيال اللي بليلي سرى
سقت له بيض النوايا جيته بصدق الشعور
بدويٍ قضبوه العلم والعلم أقشرا
يدري إني في وصاله ما أهاب العقور
أطرق الباب بيميني ما أجي له من ورا
يشتكي قاسي ظروفه وأشتكي حظٍ عثور
كل ما مديت كفي قفّى يمشي بخترا
إيه ياقلبي تصبّر يمكن الدنيا تدور
بين علّ وعسى وإلا رجاوي هل ترى
هل ترى إن المشاعر بيننا مدت جسور
يعني لا زان ظرفك لك بقلبي معبرا
ولاشكى الحب رجالٍ على الشدة صبور
الله أعلم وش يصيب القلب لامنه طرى