أعجز عن التعبير والوصف والبوح
وتعجز حروف الكون عن وصف خلي
ريم الفلا ريان عوده ومملوح
خشفٍ على عرش الجمال مْتعلّي
جامع صفات الزين وبخده الضوح
مثل القمر بين النجوم مْتجلّي
ماشفت مثله بالملا طبع ومزوح
لامن طرى لي خاطري مسفهلي
كله دلع صوته رخيمٍ ومبحوح
يعزف وتر قلبي دلال وتغلّي
له رمش وان سلهم فلاشك مذبوح
فعله بقلبي جيش نازل مظلّي
باسباب ظرفه صرت انا منه مجروح
ياما تمنيت الوصل ما حصل لي
ولامن فقدته صاح في داخلي نوح
تبكيه عيني والخفوق ومحلّي
ياروح وين اللي سكن داخل الروح
وين الذي تل المعاليق تلّي
وين الذي عطره مع أنفاسه يفوح
هو منيتي بالكون شمسي وظلي
تفوح مع ذكره شجون الغلا فوح
إي والله إنه مالكٍ كل كلي
يمرني طيفه مع الليل ويروح
وألمح خياله في منامي وأهلّي