يابحر بعيد
مالوش مرسى
حبيبتي تايهه بين موجك
لا شط قريب بتوصله
ولا تقدر على موجك
أمانه يابحر تسمعني
تهدي شوية من موجك
وحيدة بحزنها عايشة
دي بنتك شيلها فوق موجك
حبيبتي يامنى عمري
ح اجيلك وارمي احزانك
واجيبلك م السما فرحة
وحبي ده كله علشانك
ياريتك يا أمل بكره
تحسي باللي شاغلني
دا انا عايش عشان حبك
ونفسي أموت في أحضانك
حبيبتي لو غشاك الموج ماتخافي
د انا عوام في بحر الحب متعافي
كلامي في الهوى بلسم
كلامي للقلوب شافي
ح تيجي تعيشي جوايا
واحس ب حضنك الدافي
وآاه يا نفسي من حسنك
دا حسنك زلزل اطرافي
حبيبتي ومهما فين كنتي
ح اجيلك واسعد ايامك
لاعمري نسيت ولاهنتي
ولا ح ارضى بحرمانك
ح اجيبك تسكني ف قلبي
وقلبي ح يبقى اوطانك
واحسك روح بقت مني
واقول وانشد بأوصافك
تقولي معايا وتغني
وح اسمع أحلى أنغامك
قوليلي بس فين انتي
وقولي كل أسرارك
ح اشق الموج ولو عمري
خسرته... شويه علشانك
عاشق الورد