يابلدنا
الله عليكي يابلدنا
وكل شيء ببلاش
حتى الدهب برضوالدهب ببلاش
الأكل متردخ ومتوفر والكل ماتوصاش
والشرب ميه معطرة وازاي مانشربهاش
والبطن ماشية مطرطرة برضو ومابتترضاش
عمالة تاكل وتظلط في فاكهة أو جلاش
والناس بتمشي مظأططة فلوسها حاضره وكاش
والصحة بمب وحديد والخلق مابتعياش
والدمعة جوه العيون عمرك ما ح تشوفهاش
والضحكة فوق الشفايف لازقة مابتسيبهاش
والشغل عند الموظف يمشي مايستناش
لا درج عنده اتفتح والرشوة ماقبلهاش
ولا ست واقفة تعيط دايخة في صرف معاش
ولا خوف من المعتقل والكلمة مابتنحاش
ولا حد سافر لبرة وبقى له مده ماجاش
ولا حد ضيع فلوسه في حاجات وماكسبهاش
ولا حد ضايع ببانجو وحشيشة ماشربهاش
الله عليكي يابلدنا خيرك ماعمره انقل
يحميكي رب الوجود ياتاج رؤوس الكل
يجعل نهارك نهار أبيض وزي الفل
وتكيدي اللي يعاديكي ويدوقوا مر الذل
الله اكبر عليهم وعنيهم اللي تسل
لما يشوفوكي جميلة والخل جنب الخل
لا سجن ولا سجان ولا حياه بتشل
والناس بتضحك وتفرح ووشوشها بدروهل
الله عليكي يابلدنا أغلى وأحلى محل
بلدنا في القرن الخامس والعشرون