عز الله أن الجرح من راعي الجرح
غالي علي وأغلى من الجرح راعيه
حزني عليه مشيدٍ بالحشا صرح
ليته يجي ويشوف وش حال مغليه
اللي حرمني بغيبته لذة الفرح
عل وعساه يعود والبعد ينهيه
قصة غيابه غامضه تتعب الشرح
وأخاف لا وضّح مع الشرح خافيه
وأزيد همّه غم ويصيبه الترح
من دون لا أقصد وازيد المشاريه
ذكرى وداعه يا عرب صايرة ضرح
كل عام ازور الضرح أذكره وابكيه
ما يقبل القسمة ولا الجمع والطرح
اللي على الأطلال يستجدي التيه
هد الوجد حيله ومن قرح لي قرح
ويموت كل ما جابوا الناس طاريه
بسباب بعده عايشٍ ضيقه وبرح
الله يبيحه كثر ما جرحه أغليه
مترهبن بدونه بلا معبد وكَرْح
لين ايتجسد بالقصيد وقوافيه
لا والله راع الجرح أغلى من الجرح
وحبي له اكبر ولا الوقت يمحيه