يمضي العمر بالخلق عامٍ ورا عام
وتمضي الخلايق بين ضايق وجاني
شيٍ توقّيته وجابته الأيام
وشيٍ هملته بالحياة وعداني
وشيٍ رخصه القلب وفي قيمته سام
ورزقٍ بغيته بالعمر ما بغاني
وأحدٍ نخيته للمراجل ولا قام
وأحدٍ بوقفاته وطيبه جزاني
وحظٍ طردته بالعمر مثل الأحلام
وحظٍ وأنا في وسط داري نصاني
مدري نصبت أشواك ولا هي أعلام
ومدري دعيت الشعر ولا دعاني
ومدري جفيت الخلق أو روس الأقلام
ومدري عصيت القلب ولا عصاني
قلبٍ ملكته قلب فارس وضرغام
ونفسٍ تعاف الذل لو هو ثواني
وعزٍ تبيه النفس للنفس ما دام
يسري الهبوب بوسط عوج المحاني
راسٍ يهابه كل حاسد ومعتام
حرٍ عناده بالحنايا شعاني
يسهر توال الليل والخلق نيام
ينسج جزيلات الشعر والمعاني
خبري براسي للصعيبات مقدام
تنصاه أهل العرف قاصي وداني
لي راس عن قاع العذاريب شيّام
بالطايلات وطيب فعلي ملاني
ما هام ببحور المناقيد أو عام
انخى عزومه والظروف تحداني
نعمين يا راسي وصفّيت الأنعام
اما شريت العز ولا شراني
راع الحلم نابه على جلد الإبهام
والحمد للي من شروري كفاني
يا شاعر الموت اللي بكوا منه الأيتام
في يوم عشرة ما تصفّي ثماني
شاعر قصد بالموت ماهوب ينلام
عوج الرهايف من هجوسه تعاني
أخاف من شيٍ توزيه الأيام
ومن ساعةٍ يغدي بي الموت فاني
وأخاف اطرد بالعمر مثل الأوهام
وفي ساعةٍ خفت البقى في زماني