على اللي يقرّب شرّد الصيد والقيعان
ويبعد بمن ضاقت به الدار من داره
صنع للسماء … لكن تمالوا هل اليابان
وحطوه سياره وهو كان طياره
على الأرض … لكن ما يغبطك يا بو جنحان
إذا غطك مسيّان تسري به أنواره
غرام البعيد المنكف العاشق الولهان
ومرام الغريب اللي تضايق من زراره
على القار … ما تسمع هوى من ورى البيبان
وعلى الرمل … ما يدخل مع الشنطة غباره
إذا جاك سوّاقه ما يشكي الجذا تعبان
وينعس بركّابه إذا طال مشواره
يحبه فقير الناس ويحبه السلطان
ولا غيره لراعي المقانيص سياره
ينزّل هواه ويجحد الويل والسيمان
وياخذ شهر ما جرّت يمينه عياره
وسومه من الشركة على الشبك والسّكّان
وعلى شنطته وسم وعلى مقدمه شاره
يسوقه بحيحيٍ جايزن له وهو طربان
غرامه ولو كثر التعب … قبضة الطاره
ولد راعي الرمله إلا عدّو الفرسان
تنقّاه من بين السياير وأختاره