صبية
راميه سرها
حضن الصبي
ورعد فارش المكان
وزعيق لريح
جبان...خفي
وليل غميق
قرصان...قوى
تجرى البنية... بالأمال
يمين...شمال
تسبق دموعها بالسؤال
راح فين حسن؟!
راح فين حسن؟!
إياك
وخوفك يا صبية
لساه
في يدك العفية
أبو قلب
بفتة وروح سخية
وخداه الخطاوى
لحد فين؟
مش دى القضية
أنتِ القضية
يا صبية
يالي سرك
ويا سره
ونجمك معاه
لاَبِد في نجمه
دا الوجيعة
تنازعي منها
لو يكون
سببها منه
إيه العمل؟
لو بحزنك
توهتي منه؟
ما يصون حياكي
يا عفيفة
غير وفى
شاطر حسن
بيتوه ساعات
لكن قواه
في حضن قلبك
الدفي
أرمى قلوعك يا حسن
وارجع لها
مين اللي حبك قدها؟
صبرت عليك
قالت مقدر
والأصيل يا حسن
لو فين ما يكبر
ويا حبك يا حسن
التوبة تُقبل
ويا رجعة الرجال
الغُمة ترحل
قلت إيه؟
تيجي تأخد خطرها؟
حأرجع لها
توهة وخدتنى عنها
محقوق لها
يا غربة خدتي بحقها
وإياك تكوني يا غربة فاكره
إن فيكي شفت حالي؟
أو جمالك؟ولا مالك؟
عوضوني طله واحده
للحبيبة اللي في بالى؟
الحبيبة
اللي بكاها عندي غالى
حأرجع لها
وأفرش قلوعي عندها
وأرد كيد
اللي يدوس على طرفها
حأرجع لها
وأقول لها:
أنا لغز سرك والمقدر
وأنتى جوه وريدى ماشية
حتى بعد ما جسمى يرحل