إصبح تراك الشمس والا امس

إصْبِحْ تراكْ الشَّمْس والا امْسْ

يَلَنْ خَدّكْ شِفَقْ لِمْغيبْ

وانْ فاتْ مِنْك اللَّمْس بالأمْس

لا يْفوتْ مِنْك اليوم تَرْحيب

عَنْ طِبْ «طمْسْ» اغْناني اللمس

مِنْ يَنبك اللي يِخْجِل الحيب

شَكْلِكْ فريد الشَّكْلْ شَكْل امْس

بَحْر المكارِمْ مَعْدَن الطيب

مَ ادْري اشْ حَظّي مِنْكْ طَلْمَس

حاسِنْ وفيك الظَّن مَ يْخيب

إسْفِرْ تراك البَدْر والشمس

والبَرْق والكوكبْ بلا ريب

وِاوْصَلْ تراك السِّعْد والإنْس

وابسم تراك اطْيَبْ مِنْ الطيب

أَسْمَعْ دبيب النَّمْل والهمس

وان يَا عذولي سَمْعي يْغيب

ولَي لاح بَرْق وريفْ نَسْنَس

شَبَّن عَلى قلبي لواهيب

تاح الحلل كِلّها وْلِبَسْ بَس

جِلْبابْ تِخْضَعْ لِهْ الجلابيب

وغَرْس المحبَّهْ يْفُوقْ كِلّ غَرْس

ثابت وأَرْماله مِواجيب

طَلْمَسْ على قلبي حَرف طَمْس

مِنْ عَلَّم السِّحْر الرَّعابيب

دَسّيتْ سَدَّهْ فِيْ الحشا دَس

وما يِعْلَم الا عالِم الغيب