الكلمة اللي ماتجي مسموعه
وحشتني وتقولها بميوعه
تقول أحبك بس أحب أخونك
وأقول حبَّيني أنا ومجموعه
بس المهم إني أنا أسمع صوتك
لاتقطعين الصوت يالدلوعه
صوتك يشتَّتني قبل يجمعني
اليا سمعه القلب ضمّ ضلوعه
من انقطع صوتك وأنا أتنهَّد
وأصبحت أجاهد عبرتي واللوعه
ياللي فقدتك وانقطع جوالك
عاشقك وش بتفيد كثر دموعه
مانيب باكي بس ماني ساكت
بأنشر وصوفك في كذا مطبوعه
وأروح وأنشر في دول أوروبا
وأقول شقرا والجسم مربوعه
تسمع لأبو نورة محمد عبده
وتحفظ لستَّ الكل كم مقطوعه
وأسلوبها تطغى عليه الحكمة
ولاهيب لاتتبع ولا متبوعه
وان جت بتضحك تضحك بعفوية
وياشين أهل الضحكة المصنوعه
فقدتها تكفون لاشفتوها
قولوا حبيبك ماهتنى باسبوعه
سواح يبحث عنك بين العالم
إلين صار اسمه في كم موسوعه
من يوم غبتي صار عقله غايب
وشانت طبوعه بعد زين طبوعه
حاول يشوفك بس كيف يشوفك
وأكثر طرق أهل الهوى ممنوعه
حبيبتي.. ترى السفر والجفوة
ماهي طريقة فالهوى مشروعه
ما قلت لك يامبعدة عن عيني
لاتقطعين الصوت يالدلوعة
وان كان في قلبك حبايب غيري
خلاص حبيّني أنا ومجموعه