حبيبي جيتلك شاعر عساني أبلغ المضمون..
بشعْر يْليقبك، يستاهلك، تزهابك طْروقه
بعد حان اللقا، بعد التعب، كل انتظار يْهون
مثل غيثٍ يفزّ لْه الشجر، تحيا به عْروقه
أنا جيتك أسابق موعدك لك عاشقٍ مفتون
معي قلبٍ لك يقدّم اجلَّ إحساسه وْشوقه
تجيني، كل ما بي من نفَس يستقبلك بلْحون
مثل ما أنفاسك العذبة بريح المسك مسيوقه
هنا نرسم أمانينا بْشكل راقي، وبأزهى لون
نعيش بْحبنا الصادق ونقطف حالي عْذوقه
يمرّ الوقت في قربك سريعٍ ما أعْرف شْلون
كذا تْصير الدقايق همّ والساعات مخنوقه
عيوني ما ملاها غير شوفك وانت ضيّ عْيون..
متيّم شافك أحلى أمنية قلبه، ومعشوقه