بعض الأوادم مجرد بوق
ولا مثل طبلة الطبال
تلقاه بين البشر مزنوق
والناس تعقل وهو عيّال
ولافيه عنده خبر موثوق
والكذب دائم صفة لانذال
وإذا لقى له عشاء وعلوق
الناس قامت وهو شغال
الصحن قبله يحوقه حوق
ولا تنشرى رفقته بريال
يكثر من الرز والمرقوق
ويقول ذي مهرة الأبطال
وإذا تهرج غدا لقلوق
يكرر الصوت والموال
مثل المحرّج بوسط السوق
يزعجك صوته كما الدلال
مطفوق لا قيل لك مطفوق
ينثر علومه كما الغربال
ماهو لسرّ الخوي صندوق
ولا يستمع كلمة العذال
وان قيل هذا عديم الذوق
لا شك ذا حال من لا حوال
الله خلق بالعباد فروق
ورجال في كل وقت رجال
رجلٍ كما لصقر يطلع فوق
ورجلٍ مكانه بجنب نعال
ورجلٍ يخون الخوي ويبوق
ورجلٍ وفي يحمل الاثقال
ورجل كما قيل مثل الدوق
ضاري على قول روح تعال
وكم واحدٍ شاربه محلوق
وهو كريم الأبو والخال