أبي موت

أبچي موت

وجفني تابوت الصور

شيَّعِت بي ذكرياتي ..

والاحلام الماتت بوكت السحر

ولا ربيع اول ولا ثاني بحياتي

آنه كل عمري گضيته

بين عاشور وصفر

من فتحت عيوني عالدنيا ..

شفت بيهن دمع

والنفس من زار صدري ..

اتعثّر بكسرة ضلع

وشفت شمس الله يتيمه ..

وحالهه ايبچّي الگمر

والگمر شفته مقيّد بالظلام

والشمس صار الهه خلف الباب ..

ذاك المستقر

وما گدر يدركهه بالشده الگمر

فهم كلٌّ في مَدارٍ يسبحون

هو في فُلك الوصية ..

وهيه في فُلك القدر

وانعصر صدر السماء ..

ولن نزف نور الله منهه ..

وطاح كوكب

طاح كوكب، وجهه يزهر

حلمه ابيض، لونه احمر

ودع الدنيا گبل ما يلتقيهه ..

واعلى صدره ..

تارك البسمار من حقده اثر

وارتفع صوت استغاثه ..

ها يفضه ..

طاح نجم اسهيل مني

شافته سابح بدمه ..

شفافه حلمانه بحنان ولبن امه

لونه شاحب من أثر ذاك الدخان

وأثر چويات اعلى جسمه

چان باب الكون يتصاعد لهيبه

والجمر يتناثر لوجه السمه

وينزل مطر

وچان جو الفاجعة مغيّم خطر

اندفعت الباب وتعالت ..

من صدر مخنوگ ..

شهگه

شهگ ويّاها الدهر

ولني اسمع ويه صرخة يا علي ..

كسرة ضلع

والصده يرجعلي من سابع جرح ..

آه ودمع

چني اسمع ساق عرش الله انكسر

حافر البسمار شفته ..

بيه شظية من الضوه

وعلى الحايط ..

سالت آيات وسور

وانرسم بيهن نحر ..

وخيمه محترگه وسبي

ورايه بيد المنتظر