ماهو حلا.. كل ما زعلنا تغيبين.!
ونبقا كذا بعنادنا.. نموت حَرّه..
وادري نهايتها.. ابرضى وترضين
لكن على ابسط شي..ليه إنتشرّه.!
ولازم اعدي لك وانتي.. تعدِين
عشان ما تنعاد.. في كل مره..
من يومها ضايق تقل شايلن دين
وضيقي مع الايام يزداد شره..
واليوم: مثل الأمس، طيب وبعدين.!
وإليا متى وذا حالنا.. في مقره.؟؟!
تخيلي لو حالنا دايمن زين
وتخيلي أوضاعنا مستقرّه..
كان إنتربع فوق عرش السلاطين
ونعيش لحظات الفرح والمسرّه..
وكان إنزرع للحب ورد وبساتين
وانسى حياةٍ دون لقياك مٌره..
ودام الغلا بقلوبنا.. ليه تقسين؟!
وليه الزعل ما بيننا.. بس نكرّه.!
خلي عنادك.. يا بعد نور هالعين
عشان أشوف أفراحنا مستمره..