عيونك بحر موزون، رمشك قافية
وحيطان قلبك بالمحبة دافيه
لا تكسِّر قزاز الوزن أنت ومعي
بتعرف أنا عالرَّمل بمشي حافيه
عندي وطن موجوع ع مرّ الدهر
كلمة وجع ما بظن حقّو وافيه
كنا بكاس الما زهر نسكب فرح
مرّ القهر عكر الكاس الصّافية
كانت ليالي الشام تحيي قلوبنا
صار (البلم) يحمل جثثنا الطافية
حتى البحر ضاقت علينا سواحله
وما عادت الأشعار فينا كافيه
وال (نّا) ال دَلِّت عالجماعة من قبل
حَلّت محلَّا اليوم (لم) النَّافية
ولمّ الشَّمل، ت صار سقف طموحنا
نشوف الأهل صدفة، بصحة وعافية