سكت وغنت الورقا طواريها على الاغصان
صداها يلمس اجروح المعنى في تغنيها
وانا ياغربة احلامي بعيد الدار والاوطان
وحيد ابرحلتي نفسي بعيد الي يسليها
غريب وغربتي فيني غريبه مالها عنوان
مشارب مرها عندي يشابه طعم حاليها
تذكرت الزمان الي مضى يازهرة البستان
ثواني مرت ابعمري مع الذكرى وتاليها
وانا بعدك تواصيفي مثل مركب بلا ربان
اهيم ابلجة امواج البحر نفسي معنيها
لفاني زاير اطيوفك ثواني غادر الشفقان
وتركني بين نيران اشتياقي واقعٍ فيها
تمنيتك تعانقني بعد حطمني الحرمان
وتهدي كبدي الحرا سواليفك وترويها
لقيتك تنثر احلامي وتتركني بلا جنحان
تعمد تلمس اجروحي بكفك لجل تدميها
خلاص اليوم ماباقي بقية ياغصين البان
فقد شاعرك أحاسيسه بعد هجران غاليها