قصيدتي بأكتب من الود موضوع
أبحرت لك والموج بالفكر عاتي
قلبي من الهجران والبعد مخلوع
وأنتِ مدار البوح قصة حياتي
موجوع واللي كوّن الكون موجوع
فقدك حرمني من لذيذ أمنياتي
حبل الرجا يا غايتي فيك مقطوع
وش لون ابجمع فرحتي من شتاتي
ما ترحمين اللي من الفقد مفزوع
يوم الفرح مسلوب من ذكرياتي
ليلي قضيته منك آهات ودموع
ضاقت بعد فرقاك أربع جهاتي
غلاك جوفي يا هنا الروح مطبوع
شوفي مكانك بين ذاتي وذاتي
اللي بقلبي لك من الود مزروع
أسقيه من نيلي ويشرب فراتي
لكن لقيت الياس ماهو بمدفوع
محتار مدري يا غلا وش سواتي
لو سقت لك بوحي فلاهو بمسموع
أصرخ وحرفي ما تجاوز لهاتي
محروم ميت في غرامك من الجوع
وتدفعني الحاجة ولا ألقى غناتي
واقف على بابك لي أكثر من أسبوع
على الأمل لو كنت فاقد ثباتي
ما جابني لك ذل وإذعان وخضوع
جيتك وفا يشرح ملامح صفاتي
ما دمتي لغيري مثل حبة الكوع
غلاك باقي لين حزة مماتي