أفاس الفنون

أَفَاسْ الْفُنُونْ

ضَمَّتْ الدَّنْيَا اسْوَارَكْ

مْنِينْ ضَمِّيتِي بَاحْضَانَكْ فَاسْ لْبَالِي

بْسِحْرَكْ مَفْتُونْ

وْفَكْنُوزَكْ وَاسْرَارَكْ

وَانْتِ غَالْيَة مَنْ كُلّْ مَا هُوَ غَالِي

أَفَاسْ الْمُتُونْ

بَالشَّرِيعَة اضْحَاتْ انْوَارَكْ

عْنَايْتِي وْرَاحْتِي وْدْخِيرْتِي وْمَالِي

أَفَاسْ الشُّجُونْ

نَاسَكْ هُمََا عْمَارَةْ دَارَكْ

جْبَاهْهُومْ عَالِيَة فَاقَتْ كُلّْ عْلاَ لِي

أَفَاسْ لْمَلْحُونْ

سَاقَتْ الدَّنْيَا اخْبَارَكْ

عَرُوسَة مَحْرُوسَة بَالجَّاهْ لْعَالِي

حَبِّيتْ فْضَاكْ وَمْكَانَكْ

هَوَا يَصْفَى بِيهْ لَمْزَاجْ

حَبِّيتْ بِنَاءَكْ وْعُمْرَانَكْ

وْخَطِّيفْ سَاكَنْ لَبْرَاجْ

حَبِّيتْ عْيُونَكْ وْغَدْرَانَكْ

حْلاَوْتْهَا تْحَلِّي الّْلجَاجْ

تَارِيخَكْ وْعِلْمَكْ وْايْمَانَكْ

لَسْقَامْ لَرْوَاحْ هِيَّا لَعْلاَجْ

أَفَاسْ أَفَاسْ بَهْجَةْ لَعْيَانْ

صُورَة سَاكْنَة فْقَلْبِي وْعْيَانِي

أَفَاسْ أَفَاسْ عَشْقْ لْفَنَّانْ

وَانْتِ لاَهْبَة فَنِّي وَاوْزَانِي

أَفَاسْ تْجَاوْرُوا فِيكْ الأَدْيَانْ

مَسْلَمْ مْوَحَّدْ وْعِبْرِي وْنَصْرَانِي

مَنْ الإِيمَانْ حُبّْ الأَوْطَانْ

وَأَنَا اخْتَرْتَكْ تْكُونْ اوْطَانِي

أَفَاسْ أَفَاسْ يْحَرْسَكْ الدِّيَّانْ

مَنْ شَرّْ كُلّْ حَاقَدْ ظَالَمْ جَانِي