اشوف لحظات موتي لا نويت أنساك
و تنعاد روحي بساعة ينْذكر طاريك
هذا وانا ناويَ أنْسى كيف هو فرقاك
باموت ضيم وغبينه لين ما لاقيك
غايب وهذي عيوني شوقها رؤياك
عمْيَت عيوني حبيبي كِثْر ما تبكيك
ردّ النظر هات ثوب الوصْل من يمناك
اشمّ ريحك ولا هو خاب ظنّي فيك
تعال ضمّ الوليف اللي تعب لرْضاك
يزرعْك حبّ وغلا من داخله يجنيك
اسقي ضلوعه عساها ترتوي من ماك
صعبه تشحّ وقضى عمره وفى يسقيك
لك هزّ جذْع الحنين وانتثر ذاكراك
لَمْلَمْه شوق ونَقَفْ من حلوها يهديك
سبحان يالزين ياغْلى الروح من سوّاك
ميّزك ربِّ وعطاك وبالحلى كاسيك
ربّي سكب حبّكَ بْقلبي قبل ما ألقاك
من غير تدري احبّك حبّ واْداريك
انساك يا كيف وانت الفكر والإدراك
حتّى لوَ انّك بغيت العافية بعطيك