الرجوع من الخطاء ما هو معيبه
كلنا نخطي ونرجع للصوابي
المطمّة والملمة والمصيبة
من يزيد الطين بلّه مع ترابي
والغشيم الشرّ دايم يبتديبه
لا يقدر للوجوه ولا يحابي
والذي من حين ما يقفي صحيبه
يشذب العرقوب ختّال الغيابي
والمودة ما تجي قهر وغصيبة
من كره شخصك يحملك العتابي
والزمن دوّار وأحداثه غريبة
يظهر الخافي ومكنون المخابي
أي سيفٍ فاللقا ما ينعدي به
خير من نقله وجوده فالجرابي
والرجال اللى لهم نخوه وهيبة
مثل حدّ السيف بتار الرقابي
إن بنوا حكمه مبانيهم قطيبة
والهمم والروس من فوق السحابي
ناطحين الدهر بالروس الصليبة
بالثقه مثل النمارة والذيابي
في مواقفهم يهدون الصعيبة
ما يحبون المهايط والكذابي
ومن يعادي ربعه ويجفا قريبه
ما يعيش العمر محشوم الجنابي
واشهد أن الظلم للظلام خيبه
من يطيع إبليس ووعوده سرابي
والقبر قدام مركوز النصيبية
داخله مقفول محكوم الضبابي