الشهرة اللى تجي بالكذب ماهيلي
غيري يدور على الكذبه ويشريها
يامن سرقت القصايد والمواويلي
وقمت تشدو بها والناس توحيها
والناس تدري بها جيل ورا جيلي
لا تحسب انك على مثلي تمشيها
لاكثروا اهل الحكا والقال والقيلي
اكتب بيوت تشوق في معانيها
اسرج خيولي مع من يسرج الخيلي
لاصارت السابقات تفوز بيديها
وارفع سلوبي عن اهل العدل والميلي
وصوّب اهداف كم رمّاي يخطيها
ببيوت شعرٍ سوات البن والهيلي
بين النشاما تقدّم في مصافيها
في بيت من يكرم الضيفان بالحيلي
من قبل ينشد ضيوفه ويش اساميها
ون جتني المخطيه من فاتر الحيلي
قمت اتعيما عن الزله وراعيها
والغلطه الثانيه تمشي مع السيلي
اصد عنها ولا حتى استمع فيها
وان جاب له ثالثه ذوّقته الويلي
من خنجرٍ طعنته يبلش يداويها
من عقبها يشكي لغيري ويشكي لي
ويتوب لاشعار ما ينظم قوافيها