الشهرة اللي تجي بالكذب ما هي لي
غيري يدور على الكذبة ويشتريها
يا من سرقت القصايد والمواويل
وقمت تشدو بها والناس توحيها
والناس تدري بها جيل ورا جيل
لا تحسب أنك على مثلي تمشيها
لا كثروا أهل الحكي والقال والقيلي
أكتب بيوت تشوق في معانيها
أسرج خيولي مع من يسرج الخيل
لا صارت السابقات تفوز بيديها
وأرفع أسلوبي عن أهل العدل والميل
وأصوّب أهداف كم رمّاي يخطيها
ببيوت شعر سوات البن والهيل
بين النشاما تقدم في مصافيها
في بيت من يكرم الضيفان بالحيل
من قبل ينشد ضيوفه ويش أساميها
وإن جتني المخطية من فاتر الحيل
قمت أتعيمى عن الزلة وراعيها
والغلطة الثانية تمشي مع السيل
أصد عنها ولا حتى استمع فيها
وإن جاب له ثالثة ذوّقته الويل
من خنجر طعنته يبلش يداويها
من عقبها يشكي لغيري ويشكي لي
ويتوب للأشعار ما ينظم قوافيها