شفنا العجاج بيوضا
قلنا غمامة او حمامة ورا حمامة
كلام جرنا لكلام...
قلنا نحيدو حيط العار...
ونحيدو على فمنا لكمامة
نتحضرو بحنيان الراس
ونركبو مطية الزعامة
زعمو علينا ولينا كناس
ولاحونا فاول قمامة
الباز لي كان باز خبى مخالبو
ورضى بصيد الهامة
قالوا وقلنا وبكينا وبكاو فحيط المبكى
بقى كلامنا فمكة
وكلها قبط سكة
خوت على بني عمهوم حنان
يصليو فمكة
ويزكيو فكان
المال لي يفك من لهوال
ويخلي الخرفان غوال
سمع نقولك يا قليل الحيلة
حيلتك تباعت فسوق الشهامة
يا لي عولتي على نسا لقبيلة
نقصاتك اخونا نقصاتك لفهامة
روسنا ولات اخونا دليلة
نهار حطينا الشاشية عوض العمامة