شارعنا القديم.. ضوليله وأمان
رجالاتُه قويه.. وقوتهُم حنان
يخافوا عَلى الصُغَيَّر
ويخافوا عَ الكبير
أعراضهُم مصونة
لو بنت بسلامتُه.. أو بنت الغفير
ولو نِفْسَك تِهِفَك على أكله تشمِهَا..
تلقىَّ الجار يخبط بهدية حبيب
جايب لَك بُصاره أو رز بحليب
وان بِعِد الشر نَابك.. مكروه أو مُصاب
كل الحتة تجرى
ده وَدا.. ودَاَ جاب!
كتيبة وعِيله
في أحزانها أصيله وأفراحها جميله
دا يزعل عشانك ودا يحمل همومك
ويسد الحساب
شارعنا القديم.. حكايتُه حكاية
علمني ببساطته.. كتير م الحاجات.. سكناني ومعايا
واحشني بذكرياتُه
وناسُه وصُحبتُه
وحزينة لسُكاتُه.. على سارق ضحكتُه
شارعنا القديم
أتهدم فيه بيوتُه
واتفرق فيه رجالُه
اتبَدِلِت معالمُه
وإحساس اليُتمْ حالُه
ضوليلتُه.. حَرَرِتْ
انداست الكرامة.. والغربة نَخوَرِتْ
كان لازم لينا وقفة.. ونعرف السبب؟
احنا اللي كنا.. واحنا.. لسانا هو احنا..
وزايدين دقن وشنب؟
دقون.. بحنجلة.. لا زادونا مرجلة.. ولا عدل وأسلمة
ما جابوش غير هرتلة
وغباوة وعَكننة
الله يقلق راحتكوا.. يا اللي قلبتوم راحتنا وزرعتولنا الفِتن
الله يِرْجِعْ جمالك..
وجمال أهلك وناسك
وطيبتك يا وطن
تِخرس صوت اللئيم
وتعِيد الأمن تاني.. للشارع القديم