بعد شفتني في جنيف والشوق مثل السَم
في قلب الذي ما يقدر يواصلك في جنيف
لا تسأل عن جروحي ولا تقول لي مهتم
جواب السؤال اللي طرحته ما أظن يضيف
حلولٍ لمشكلتي مَعَ هجرك اللي لَم
أحسبه حقيقي بل حسبته مجرّد زيف
كنوعٍ من أنواع الدلع والتغلي أم...
كنوعٍ من الغيرة علي من بنات الريف
يالين الثرى وجباله النايفات الشم
بريفه ومدنه قالوا اللي تحبّه طيف
على مركب الهجر فْ بحر بعد ماله يَم
ترحّل ترحّال الشتا يوم جاه الصيف
سؤالك غلط، تسأل عن جروح قلبي كم؟
من الواجب انّك تسأل جروح قلبي كيف
هل جروح قلبي جات من صد والاّ هَم؟
من هموم دورات الزمن والزمان مْخيف
هذا أولا... وثانيا: يا ثقيل الدم
هموم الخلايق، كل هَمٍ وله تعريف
وهمٍ يخص، وهم بين العباد يعم
وهمٍ يجي تكليف، وآخر يجي تشريف
همومٍ توصّيك السهر ما يفيدك، نِم
وْهمومٍ تخلّي جفنك مْن المنام مْعيف
عموما... حبيبي شو تبي من عيوني تم
جروحي حقيقية، وحبّك هو التزييف