هذا الذي لا قلت ياخوي لي قال

هذا الذي لا قلت ياخوي لي قال!

لبيه! وابشر! وازهله! يا ضنيني!

مهما يكون الامر وحمولي ثقال

يحط نفسه بين نفسي وبيني

قوله يجي مقرون دايم بالافعال

لو بعت عمري بالغلا يشتريني

على كثر ماعنده هموم واشغال

لا غبتْ عن بيته ليالي يجيني

من طيب راسه جاي يسئل عن الحال

خايف ظروفي لا تبيح كنيني

كنّه يراقب حالتي وسط جوال

ويطيْر نومه لا درا إني حزيني

يشتال همي والمرض كنّه حبال

يشتدّ بي عقب ارتخا وقت فيني

لو الشفا يشرى بذل دوني المال

كله ولا يسمع بلحظه ونيني

إصب لي من دلة الطيب فنجال

لين الليالي في عيوني تزيني

مواقفه ماهي على كل ابو حال

ولاهي بصدفه بين كيني وميني

لا والله الا ثابته تقّلّ زلزال

يضرب ديار العز في كل حيني

ياقف على ساقه مواقيف الابطال

ويدق لي صدر الظفر ويحميني

عمه سنام المرجله والطنا خال

والجود دارٍ عاش فيه السنيني

عايد وعايد سمعته تشرح البال

إيعين ويعاون وربه يعيني

انا اشهد إن ابوي جاب إله رجّال

كاسب من الثنتين دنيا وديني