يا خواننا يا بتوع الفيتو قولولنا إيه بس نويتو
في إسرائيل لما تعربد وتقتل الشعب ف بيته
وتصادر الأرض وتنهب وتحرق الزرع ف غيطه
ومجلس الأمن يندّد وِيبيعوا لِب ف قراراته
ماتصحوا يا عربنا وفوقو واللا إنتوا بالخيبه رضيتو
والدم عندكو فى عروقكم خلاص مافيش بح فنيتو
دا الغرب عايش على خيركم وانتم رضيتو بفتافيتو
نفسى في مّره ألاقيكم شايلين سلاحكم مانخّيتو
والحق تاخدوه بإيديكم والظلم تتهد عافيته
ياناس قولولى بزمتكم كام مرّه رحتم وشكيتو
لمجلس الَهم بتاعكم ولا مرّه مشكله حلّيتو
دا إن قالوا كلمه تزعلهم أمريكا تلحق بالفيتو
وتعترض وكمان تشجب وتقول حبايبى يا كتاكيتو
إوعاكو تجرحوا أحاسيسهم دول لسّه نونو قطاقيطو
ياريت يا بويا إنت وأمى ماكنتوا للدنيا دى جيتو
ولا كان فى يوم إتجوزتم إيه بس ذنبى إللى جَنيته
دا قلبى م الغيظ هايفرقع وعقلى م الحيره لَغيته
يا اخواننا فوقو بقا وسيبكم م الغرب مرّّه وحواديته
ومعايا تدعو بقلوبكم ونقول يارب إخرب بيته
إللّى إخترع حق الفيتو