إن كُنتو نسيتو إللّى جرا
هاتو الجرايد تنقرا
نرجع سوا بالذاكرة
أول صفحه بخط كبير
صور الدمار والمجزرة
فاكرين عيال بحر البقر
إقرا وسمعنا الخبر
إفتح وفرجنا الصور
في الصبح كان بعد الطابور
الجو صاحي والدنيا نور
والكل كان حيّا العلم
كل الصغار دخلوا الفصول
وكانت الحصة ابتدت
وف لحظه كانت مجزرة
كل العيال بين التُخِت
صبحوا جثث متنتوره
صوت القنابل جلجلت
والأرض فجأه إتزلزلت
والدنيا نار وشعللت
تحت الحُطَام ضاعوا الصغار
وَسَط الخراب وَسَط الدمار
دُخَان غبار ولهيب ونار
لسه الأيدين ماسكة القلم
أصوات أنين وآهات ألم
ودى شنطة أهيّه
ودا سندويتش وزمزميه
ودى بنت لسّه صُغيّره
وشعورها حلوه مضفرّة
واخده أخوها في حضنها
ودمه سايل عالتراب
بيجرى ناحية دمها
ودى أم جايّه من بعيد!
تصرخ وتبكى فين وليد؟
قلبي ضنايا ابني الوحيد
وبإيدها ترفع في الحُطَام
وعايزة تآكل في الحديد
وبصوت حزين تصرخ وليد
دا لسّه أبوك من كام سنه
في الحرب برضه مات شهيد
والدم سال عالكراسات
وتُهنا ونسينا اللي فات
والقصة صبحت ذكريات
دَم العيال راح ونسيتوه
حتى السلام بتشحتوه
وطن الجدود هاتضيّعوه
يا ناس يا هوه يالاّ الحقوه
ولسه بيقولوا سلام
وعقدوا قمة الزعامات
بيانات وشجب وشعارات
عايزننا نخضع منُ سكات
عالم ضميرهم ضاع ومات
عالم ضميرهم ضاع ومات