محلى ليالي الأدب
بالحب تجمعنا
قصة وشعر وزجل
وكلامنا له معنى
اللي في حب الوطن
كتب ومتّعنا
واللي رماه الهوى
وآهاته توجعنا
فن وثقافة وأدب
واقرا وسمّعنا
فكر ومعاني وحكم
في حياتنا تنفعنا
وف كل لون م الأدب
قلنا وأبدعنا
جنود ف وقت المحن
ولا خوف يزعزعنا
كلمتنا تصبح رصاص
وقلمنا مدفعنا
واللي في نفسه مرض
وقصده يخدعنا
لأن فكره انحرف
مالوش مكان معنا
وبكل رقّة وأدب
بنقول له ودّعنا
شكرا لكل حبيب
شارك وشجّعنا
يا رب لأجل النبي
عالخير تجمّعنا