يا باب اشوفك يوم مريت مصكوك
خابرك عشر سنين مفتوح يا باب
ونصف العرب من طيب راعيك دلوك
وتلايموا في حوشك أصحاب وأجناب
امشرعٍ ما وقفوا بك وطقوك
ومنصور بالدله ولا يوم قد غاب
لو دربهم من شرق لفوا ومروك
ولو دربهم من غرب ما عنك مجناب
والشارع مسكر بناسٍ تنصوك
ربع وبني عم ومسايير وأحباب
في مجلسٍ فرشه من الناس مدهوك
الطيب عمدانه والأفعال الأطناب
كل الشرايح جاتك أشيوخ وملوك
ومن زاد راعيّك على كل ما طاب
أبو خلف عون الخوي مخلي البوك
للحيل ذباح وٍ للعود حطاب
ينفع ولا يبغي من الخير مشروك
ينفع لوجه المعتلي رب الأرباب
ماهي بنفعة كل مشروك مبروك
مزروعي ومن روس عطران الأشناب
يا باب عقب الزحمه اليوم متروك
أمسكر وخالي ولا ليتك بشاب
شدوا هلك منك وراحوا وخلوك
وفرقاك ما هانت لكن هذي أسباب
شدوا بأمر من يخلي بمده أبنوك
ويقطع لك أرقابٍ ويعتق له أرقاب
شدوا بأمر شيخٍ فرج كل مضنوك
الشيخ أبو خالد به الضن ما خاب
من جاه من جور الزمن يبلع الشوك
عود على ربعه لهم درع وحجاب
آ مر على بيته وخلاه مدكوك
وبناه قصر وبدل الباب بأبواب
ترفع له البيضا ع راس مكوك
ويصعد بها للجدي والعز هباب
عوض ضيوفك قصر مبني ومسبوك
ونصفه مجالس ما تسكر ببواب
في كل حزه للمساير مفكوك
وصفر الدلال أتفوح والجمر شباب