ثقيل الهم في صدري، ثقيل اثقل من المرحوم
هذاك اللي في وسط النعش على اكتاف خلانه
اخبره دايمًا ساكت، وغامض، وغالبًا.. كتوم
نحيل.. وثقّله همٍّ قفَل عليه بيبانه
كتم غُلبه عن الناس ورضى بالمنكتب مقسوم
مآسي، ويأس، وبؤس، وحزن.. تسابَق تربط لسانه
فاتحة المآسي كانت الوحدة ما بين القوم
عجَز يعثر على نفسه ويبغى الناس يلقونه !
يأَس يبحث عن الملجأ، وهو يبحث يطيح.. يقوم
وكل ما طاح يتذكر ثقل حمله وموزونه
يجره كل هذا ل بؤس مصيره للأسف محتوم
يواصل سعيه ويبكي على أطلال مدفونة
يجيه الحزْن من ذكرى تردّه لين ذاك اليوم
يوم اختلطت بروحه، روحٍ شِبه ملعونة
ملاه الهمّ واستسلم وعلى حاله محد بيدوم
ظروف الخلق تتبدّل حسب دربٍ يعبرونه
تفضّل شوف هذا القلب وسط نعشه معاد يروم
على اكتاف الضلوع اللي عهَدهم ما يخلونه