انا ما كنت قد العشم.. انا سيّد الخذلان
انا اللي كنت بوعودي اشيلك الى سما ارضك
انا اللي قلت انا ظهرك وانا غرفة بلا بيبان
ارمي فيني اسرارك بحافظ لك على سرّك
يا خيبة.. صرت ذاك اللي سرق منك ثقة وامان
توعّدت العدو واثري العدو، ما كنت انا مُدرك
دموعك بانت بعينك بلا موعد ولا استئذان
انا ما استاهل دموعك جعلها بس على قبري
كسرت القافية لاني كسرت اكبر من القيفان
كسرت القلب ذاك اللي سقى اوراقي وحبري
تساوت عندي الدنيا عقب ما انصكت البيبان
في وجهي رغم مالي وجه اواجه به عتَم عمري
سألتك بالذي سواك ابي وان طالت الازمان
تعذريني على زيفي وتعذريني على سُكري
أنا آسف على خداعك انا اسف على اللي كان
انا اسف على اوجاعك على دموعك على قهري
مقدّر صار.. ما يمنع اكون اني انا الغلطان
ومن الاقدار لا مهرب، وش اسوّي؟ معاد ادري
يقولون الدعاء يرد القضا.. وانا انسان
طلبت الله يغفر لي عن اخطائي وعن شرّي
وطلبت الله يحنّن قلبك الطاهر وهو المنان
كريم العطا، الحق، الحليم، العالم بسرّي
دخيلك لا ترديني.. انا متحسف وندمان
على اللي صار لك مني وضيّق صدرك وصدري