الليل لا طول عذاب المحبين
ذكرى غريب وميلةٍ واستقامه
يدله به الخاطر عن الضيق والبين
كم مرةٍ سامرت وحشة ظلامه
اسري مع الهاجس واعدل الموازين
حي الوصال الي يحشم الكرامه
لا نام من يقطع وصال الموالين
انا العديم الي عزيز مقامه
خلوني اسري والحقايق براهين
النوم يكفخ مثل فرخ الحمامه
معاد لي حيله على الخاطر الشين
الناس يوجعها العتب والملامه
كفو عن الفرقا ترانا معيفين
تلقى على وجه المفارق علامه
لا تشتكي يا صاحبي حمل بعدين
بعدين هذي مثل يوم القيامه
القلب وش هو لو تموت الشرايين
والعين وش هي لا غشاها عتامه
حملك ثقيل وشايلٍ منه حملين
ولا ذبحني غير ضبيّ العدامه
الي صدفني فالسعه ليل الاثنين
ضيّق علي الكون كله سلامه
شانه كبير ومن خوال السلاطين
في بحته رسم الدلع والفخامه
قال السلام وقلت يا بنت تكفين
صدي ترى قلبي سريع انهزامه
كم مرةٍ ذاق العذاب وصبر لين
طقت ضلوعه مثل عود الثمامه