وكنت بقول أجيب للقلب دقه منين
يحب الحب من تاني
يرجع لي الشباب وجموحه من تاني
يرجع لي أغاني حليم
وفيروز اللي سحراني
لقيت القلب سابقني
يقول العمر مش بسنين
ولا بترجّعه من رحلة التوهان
أماني حلوه وأغاني
وان شبابَك اللي راح
بيرجع لك
ويبدا ويا أول نبضه
من قلبك
بترعش للي قالك عود
وأنا جنبك
أنا الخطوة اللي يبدا عندها عمرك
بايدي همسح الدمعة اللي نازله تسيل
على خدك
وايدي الثانية راح تمسح
على شعرك
وهندهلك
أقول لك عيش حياة تانية
وما تفكرش في اللي راح
ده بعد الليل تنور دنيتك ثاني
بأحلى صباح
وتمحي نسمته الصافية الأم
وجراح
حبيبي:
افتكر إني برغم المحنة
تلقاني
ما أنا عشت الحياه صابره
ولا سلمت يوم نفسي لأحزاني
ولا الدنيا برغم اللي قاسيت فيها
عن الأفراح وحب حبايبي منعاني
وليه احزن
مدام في القلب إيماني
واذكاري
وقراني
وربي عمره ما نساني
أقوم الصبح وادعي له
فيفتح لي بيبان الخير
احس إني حمام بيطير
وأرفرف في السما وحدي
جناحي يلمس النجمة
تنور لي
برغم الضلمة والعتمة
حبيبي افتكر دائما
بإن الحب مش كلمه
دا نبضة قلب بتقولك
أنا جنبك
بتوحشني وأنا جنبك
ورغم البعد والمسافات
ورغم أن اشتياقي ليك مهوش كلمة
هقولك قلبي بيحبك
وهكتبلك بنبض القلب خبيني
في قلبك دوم وخليني
أنام فوق ريش نعيم قلبك
كده على طول
واوعى ف. يوم تصحيني