عزمت طيفك وارهقتني وصوفه
عابر سبيل ولا تجيبه طواري
البال ما مروا طراقي ضيوفه
تلحق مساريح الصباح المساري
ما بردت حر الشعور الحسوفه
حكم القضا لو ما رضى العبد جاري
يخلج صميم القلب ويلج جوفه
لجة قطيعٍ صدرت من خباري
مركن عليها لاهب القيض لوفه
تحن وتدور ظلال المذاري
من لاهب الخامس وذاري هفوفه
العود صرم والموارد عواري
العين لو ذاقت غلا ما تشوفه
قامت محاجرها تهل العباري
الضيقه الي بالضلوع مهدوفه
ماهيب ضيقة ليل ضيقة عصاري
اخطيت في حقي ونفسي عيوفه
يوم اعتزلت برغبتي واختياري
الي يحبك ما ترده ظروفه
تشرب سراب القاع سفن الصحاري
وان كان شرهتنا ماهيب معروفه
تلفض عباريد الرصاص السواري