يا اهلي
مال خاطركوم عليا ضاق
ماشي انا لي بغيت نكون معاق
ماشي انالي اخترت نكون ضرير
ولا انا لي بغيت هذ المصير
قدري نتحرم من ضيا لرماق
قدري نفقد شوفي
ويكون رفيقي هو خوفي
ولي يفهم ويقدر ظروفي
قلة قليلة من لرفاق
يا اهلي
اش حال فاقد رجليه بزوج
وعديانو فاادنيا السلالم والدروج
جوادو من حديد ديما مسروج
وعناقو للعيدان بلا اشواق
يا اهلي
لهلا يجعلكوم للا فات صداف
لبلا فالدنيا كثير وبزاف
لحروب والطرقان هدو لكتاف
سيحو الدموم ودقو لعناق
اناسي
شفتو فاقد سمعو لبكم
كاين شي حد بحالو فلهم
ما يتعلم ما يفهم ولا يخمم
وعقلوا عند ناس لعقول حماق
اناسي
انا مخلوق بحال ساير الانسان
احساس وشعور وقلب وكيان
من حقي نكون حتى انا فامان
من حقي تكون عندي افاق
حس بالامي وشعر باوجاعي
تصورني ولدك كون تحن وتراعي
بحق الله والرحمة وجميع الدواعي
كون شمس ظلامي وبلسم اشفاق