يا مل قلبٍ شكا من زود هاجوسه
قلبٍ تجرّع بوقته علقم الكاسي
ويا مل حالٍ من الضيقات محسوسه
أسباب ناسٍ عثت بالوقت وانحاسي
ناسٍ بوسط البشر والروس مدسوسه
سقوا على روسها من تحت الأمواسي
متى نشوف البشر بالخير مانوسه
والمجتمع... صافي... ما فيه... بلاسي
أسنان الإنسان تعدم من سبب سوسه
ولا يلحق الناس غير الناس الأنجاسي
كم غرستن في القفا بالحقد مغروسه
وكم غرستن في الثرى من طيب الأغراسي
كم مجلسٍ يدخله شيطان ويحوسه
وكم مجلسٍ فيه خير القوم جلاسي
وكم شايب لا سمعته تعجب دروسه
سوالفه والقصص تبري خوا الراسي
رتيبان مقعد السبيعي
فكّيت بابٍ به الأفكار محبوسه
لا بأس يا من شكا الأيام لا بأسي
وعدّيت رجمٍ كثير العشب ملبوسه
وهيضت فكري ودونته بكراسي
يا وقتنا اللي به العادات منكوسه
البعض ضيّع حياته خلف الاطفاسي
الفارس احجم حصانه وانكسر قوسه
وتاريخه أصبح عبارة بين الأقواسي
ما نشتم أيامنا ونقول منحوسه
الروس لانت وخلّت طبعها القاسي
والديرة اللي من السكان متروسه
تشتّتوا والبعض في بطن الأرماسي
إبليس لأهل المعاصي دق ناقوسه
وحنا عرفنا أن طبعه يغوي الناسي
لكن لا صارت الأنظار مطموسه
ما هي غريبة يصير الوضع منحاسي