حبيبي قال لي مره، احبج لا تخليني
اخلي مين يا قلبي ومن لي غيرك احيا به
انا كلي فدا قلبك وعشقك ساكنٍ فيني
ولو تتركني اركاني لشوفك حيل طلابه
وقلي بكره امسافر قبل لا اروح خليني
اناظر عينج الحورا وانا امسكه مهتابه
وشاح ابوجهه ورد لي سألني قال ذِكريني
مع كل فرض بفروضج وانا ابكي من اغيابه
قبل لا روح يا قلبي توحشتج تصدقيني؟؟
اصدق ليه ما صدق يا عشق الروح واسبابه
شهر من بعدها نرجع وعينه تلتقي عيني
وعدا الشهر واهمومه حبيبي الشوق ما جابه
نطرته آه يا عمري،، تخيلته يناجيني
واثاريها هبوب الريح تِدثر باقي أعتابه
رجع لي قال لي مشتاق احبج ما تحبيني؟؟
ومن ظيم ملا نفسي، نهرته زدته في اعتابه
حقيقة ما خطر لي يوم بأن العشق يأذيني!!
ولا يتغير احساسٍ اذا غيره طرق بابه!!
اظنه ناسينّي الحين ولا يرجع ولا يجيني
عسى ربي يسهل له ويمسي بين احبابه
انا مالي سوى ربي يقويني يعزيني
عزمت انسى سواليفه واسكر سالف اكتابه
هذاك اول لنا وصله وشيٍ بينه وبيني
قبل لا تمسي احلومي بسهم الغدر منصابه