الحُب مَيت،، والبقا براس قَلبي
كانه تِأمل يلتقي حبه افيوم
ما عاش لكن باقيٍ نور دَربي
لَجله غَدا قلبي أسيرٍ ومهموم؟!
اشتاق له حولي وشرقي وغربي
يمي معايه مرقده دايم الدوم
حلمي اشوفه ماثلٍ لي وقربي
يا هي عيوني ظامها قلة النوم؟!
ما دامت اللحظات تِنعاه رَبي
وش ظل لي غير الحسايف مع اللوم
ما ظَل غير انثر،، بقاياه جَنبي
وادعي يِفَرِج كرب ظامي ومكتوم
لو جن فاقد والهوى صار يكبي
ويعوم في حزنه ولو يجهل العوم
والله ما لومه عذرته وربي
معذور من بات الهنا فيه معدوم
وانا اللي حسيته سمومٍ وشربي
نزفٍ غزيرٍ والتباريح في كوم
قلبي يحبه لي خطايا وذنبي
ما روم انسى مهجة الروح ما روم